Celébrase este mércores e xoves en formato presencial e en liña na Cidade da Cultura de Santiago de Compostela
A Cátedra R en Ciberseguridade, desenvolta pola Universidade de Vigo e a Universidade da Coruña (UDC) e a empresa R, está a participar de maneira activa no primeiro encontro galego de ciberseguridade, organizado polo nodo galego de ciberseguridade da Xunta de Galicia e Amtega, CIBER.gal. O encontro celébrase na Cidade da Cultura de Santiago de Compostela o 10 e 11 de novembro, e está dirixido a empresas, cidadanía e administración, buscando trasladar o coñecemento e a actualidade no eido da seguridade da información, impulsar a industria da ciberseguridade e fomentar a creación de talento.
Paneis de debate e concursos
Ao longo das dúas xornadas, a Cátedra R colabora organizando charlas divulgativas, paneis de debate e retos sobre ciberseguridade, algúns en formato presencial en diversas sedes, e tamén en streaming.
O panel de debate Covid-19 e industria: Cando non queda máis remedio que abordar a ciberseguridade reuniu a diversos expertos e expertas no sector que compartiron a súa visión sobre a situación actual e futura da seguridade nos procesos de fabricación e nos negocios, nun contexto marcado pola covid-19. No panel, moderado por Susana Rey, responsable de Privacidade en R, participaron Belén Pérez, coordinadora do Centro de Ciberseguridade Industrial en Galicia; David González, responsable de Seguridade da Información en Coren; Armand Pascual, subdirector da Área de Ciberseguridade Industrial en S2 Group; e Yago Crespo, Business Information Security Officer (BISO) UFD Distribución Electricidad.
O reto Capture The Flag, organizado pola Cátedra R e Gradiant, desenvolveuse de xeito presencial propoñendo varios retos de ciberseguridade para demostrar habilidades e destreza á hora de resolver problemas relacionados coa criptografía, a análise forense, networking ou reversing. CTF está destinado a alumnado de centros galegos de todas as idades, que deberán presentarse co seu propio equipo e terán que resolver o maior número posible de retos nun máximo de catro horas.
Talleres prácticos
Ao abeiro deste encontro celébranse en tres sedes distintas nas tres universidades galegas, institutos de FP e o Gaiás, un taller práctico orientado á detección, identificación e análise de ameazas en redes e aplicacións, pensado especialmente para estudantes de módulos superiores ou cursos de especialización de FP, e estudantes de grao ou másteres universitarios en estudos afíns ás TIC. Os profesores Juan Carlos Burguillo, da UVigo, e Elena Hernández, da UDC, realizarán un breve repaso conceptual a través de casos prácticos á análise de malware e ás técnicas de detección e eliminación de amenazas, usando ferramentas de código libre.
Entrega dos Premios Cátedra R en Ciberseguridade
CIBER.gal finaliza o xoves coa entrega de Premios Cátedra R en Ciberseguridade UVigo-UDC 2021 a traballos académicos de grao, mestrado e doutoramento na área de ciberseguridade e no ámbito do SUG (Sistema Universitario de Galicia).
FONTE: DUVI.
