O evento será 100% dixital e poderá verse o luns 7 de marzo ás 11:30h pola Canle Directo 2 de UVigoTV
A Asociación Española de Robótica e Automatización e a Universidade de Vigo anuncian a terceira edición das Xornadas AER-UVigo, que afondará nas novas tecnoloxías que dan forma á chamada revolución da Industria 4.0. O evento, que terá lugar o vindeiro luns 7 de marzo a través de UVigoTV, porá o foco nesta edición na celebración do Día Internacional das Mulleres cunha mesa redonda denominada “Mulleres AER no sector da automatización e da robótica”.
A mesa contará coa participación de mulleres directivas de empresas asociadas a AER Automation, así como alumnas do eido da automatización e da robótica. Moderará a conversa Antía Fernández, R&D Codirector of Intelligent Systems Area de Gradiant, contando cos relatorios de Mar Masulli, CEO & Co-founder de BITMETRICS; Pepa Sedo, R&I Policies and Funding Programmes de EURECAT; Carolina López García, Chief Technology Officer de INFAIMON; María Benítez, Chief Marketing Officer de ROBOTNIK; Rocío Lara López, Responsable da Área Educativa de RO-BOTICA; Ainoa Castro, alumna do Grao en Electrónica Industrial e Automática; e Noemi Rabasco, estudante de FP Grao superior en Automatización e Robótica Industrial.
