Medio cento de estudantes de oito institutos de ensino medio de Vigo e contorna participaron este mércores na fase galega da XIII Olimpíada de Xeoloxía, que se celebrou na Escola de Enxeñaría de Minas e da Enerxía da UVigo. O alumnado foi recibido pola directora da escola, Elena Alonso, quen os animou a orientar os seus estudos cara a titulacións universitarias relacionadas coa Xeoloxía. Nesta liña, anotou que dende a escola se prepararon toda unha serie de talleres e obradoiros prácticos que xiran arredor da materia que máis os apaixona: a xeoloxía e, en xeral, as Ciencias da Terra.
Procedentes dos institutos de ensino secundario A Paralaia, de Moaña; Ribeira do Louro, de Porriño; Primeiro de Marzo de Baiona; San Paio, de Tui, e os vigueses Casares, Beade e Teis, ao longo do día as alumnas e alumnos enfrontaranse a un exame teórico e a unha proba práctica por equipos baseada nunha xincana xeolóxica. Ademais, a escola deseñou toda unha serie de talleres e actividades didácticas sobre diferentes ámbitos nos que, ademais de divertirse, poderán comprobar de xeito directo que o coñecemento da Xeoloxía é un recurso necesario para levar a cabo infinidade de actividades. Impartidos por persoal docente vinculado á escola, catro son os talleres que se ofrecen: O fantástico mundo da xeotecnia, impartido polo investigador Manuel Alejandro González do grupo de Xestión Segura e Sostible dos Recursos Minerais do Cintecx (Centro de Investigación en Tecnoloxías, Enerxía e Procesos Industriais); Paleontoloxía 3D, a cargo dos investigadores Artai Santos e Iván Rodríguez, do grupo de Análise de Concas Sedimentarias; Intelixencia artificial aplicada á utilización sostible de recursos minerais, a cargo de Raquel Pérez e Jesús Rico, do Grupo de Tecnoloxía Enerxética tamén do Cintecx; e, Termografía infravermella: visión infravermella, unha nova forma de contemplar o mundo, do que se encargarán os investigadores do Grupo de Xeotecnoloxías Aplicadas Iván Garrido, Daniel Lamas e Pablo del Río, vencellados do mesmo xeito ao Cintecx.
En quenda de tarde e divididos en catro grupos, todos os estudantes terán a oportunidade de participar en todos os obradoiros e poder facerse así unha idea da importancia da Xeoloxía para a preservación do medio natural, a xestión racional dos recursos ou a adopción de medidas ante impactos e riscos xeolóxicos.
A final nacional será en Almería o 26 de marzo
A xornada durará ata as 18.00 horas e será entón cando se darán a coñecer o nome das persoas gañadoras. En total participan nas probas 200 estudantes de toda Galicia e, entre todos eles, elixiranse a aqueles que acudirán o vindeiro 26 de marzo a Almería para disputar a olimpíada nacional, convocada un ano máis polo Colegio de Geólogos, a Sociedad Geológica Española e a AEPECT (Asociación Española para la Enseñanza de las Ciencias de la Tierra). Deste evento nacional sairá a selección que competirá na fase internacional a finais do verán.
Fonte: DUVI.
